LEGAZPI CITY-Ipighayag kan sarong Postcrossing enthusiast gikan sa Bicol Region na bibihira na ngonian sa mga jovenes an pagpapadara nin mga Postcards.
Segun kay Sir Rey Anthony Ostria, sarong Philatelist, Peryodista, Educator, sa intrevista kan Bombo Radyo Legazpi, na haros bako na pamilyar an mga jovenes sa mga Postcards.
Dagdag pa niya na haros wara na nin mga mail boxes ngonian sa postal offices, orog na sa mga provincia sa nacion.
Nagkakaigwa man suboot nin problema ngonian an Philippine Postal Corporation (PHLPost) huli sa saindang utang asin iba pang kadifisilan.
Napapansin man niya an problema sa mga stamps, na dae naipapadara sa mga provincia.
Sa Bicol Region, haros wara na suboot na mababakal na bagong mga stamps, arog kan nababakal sa Manila Central Post Office, alagad mga saradit na post stage stamps na komon na piggagamit an yaon digdi.
Siring man an presyo kan mga stamps an mas mahal na an singil kan Postmaster.
Sa ibong kaini, tinawan doon ni Sir Rey na an saro sa punto kan mga Postcards, iyo an eksperyensya nin paghahalat, na bibihira na ngonian sa digital age.
“One of the things that we can learn from Postcards or sending Postcards is that communication doesn’t have to be immediate, it may also take time…and part of swapping Postcards with peopole, is the experience of waiting”, dagdag pa kaini.
