LEGAZPI CITY-Ipigheras kan sarong Postcrossing enthusiast an saiyang kakaibang paagi nin pakikipag-komunikasyon sa ibong kan fast paced digital world.
Segun kay Sir Rey Anthony Ostria, sarong Philatelist, Peryodista, Educator, sa intrevista kan Bombo Radyo Legazpi, na an postcrossing an saiyang nakahiligan poon kan taong 2013, kan mahiling niya an simpleng mga Postcards sa sarong Shop sa U.S., kan siya estudyante digdi.
Huli digdi, nagpoon na siyang mag-kolektar nin mga Postcards sa mga pigbi-bisita niyang mga lugar asin nagtatagama nin extra kaini ngani mai-heras niya ini sa iba.
Kan nakaaging taon pa sana, kan siya mag-poon na magpadara nin mga Postcards gamit an mailing asin naghanap siya nin community manungod digdi.
Sa ngonian, kadakol na siyang pigpapadarahan kaini na mga amigo asin amiga, magin mga kaparientes, sa manlaen-laen na lugar sa luwas kan nacion.
Kabale sa saiyang mga napadarahan, an mga Filipino friends niya, magin sarong Youtuber, Scientist, asin iba pang mga personalidad.
Nakapag-padara na siya nin mga Postcards sa Portugal, Chile, Kenya, Brazil,asin ngonian piglalaoman niyang makapag-hanap pa sa parte kan Africa, South America, asin Antarctica ngani makapag-postcrossing, huli ta bibihira suboot na makahanap sa mga lugar na ini.
Sa panahon kan digital age, sinabi niya na wara na masyadong nae-enganyo o bako na pamilyar sa postcrossing an mga joven.
Nagkakaigwa man suboot nin problema ngonian an Philippine Postal Corporation asin haros wara na nin mga mail boxes sa mga post offices sa nacion.
Pig-enganyar man niya an iba na mag-explore sa siring na pakikipag-komunikasyon huli ta magayon ining paagi, asin sa ngonian importante para saiya an paghahalat sa ibong kan emergency sa digital world sa presenteng henerasyon.
An postcrossing iyo an sarong proyekto na nagtutugot na makapag-padara nin mga postcard asin mag-ako nin mga postcard hale sa mga random na personalidad sa bilog na kinaban.
