LEGAZPI CITY-Labing 20 katawo an nairido makalihis an makusog na magnitude 5.7 na linog na tuminama sa Shizuoka Prefecture sa central Japan kan amay na aga ngonian Domingo, Nobyembre 8.
Susog sa Japan Meteorological Agency, namatean an upper 5 intensity sa scale of zero to seven sa Chita City, Aichi Prefecture sa hangganan kan Shizuoka, mantang wara man nin huma kan tsunami na naibareta.
Idinagdag pa kan ahensya na 30 taon nang dae nairehistro an linog, na arog kaini an magnitude sa Aichi.
An intensidad na “lower 5” namatean man sa Aichi, Shizuoka, Gifu, asin Nagano.
Pigtatantya kan ahensya na an epicenter kan linog, namumugtak sa kanlurang parte kan Shizuoka, sa rarom na maabot sa 41 kilometro.
An mga awtoridad sa Higashiura, Aichi, nagreport na an suplay nin tubig, nadistroo sa nagkapirang parte kan banwaan.
Nagkapirang mas maluyang aftershocks man an naireport sa nasabing lugar sa nacion.
