LEGAZPI CITY—Nagkundusir nin coordination meeting an kapulisan sa banwaan kan Camalig kairiba an lokal na gobierno asin Municipal Disaster Risk Reduction and Management Office makalihis an liwat na pag-alburoto kan bulkang Mayon kasuodmang Biyernes, Oktubre 30.
Segun ki Camalig MPS Actinf Chief of Police Police Major Jonathan Apil, sa intrevista kan Bombo Radyo Legazpi, nagkaigwa nin evacuation sa tulong barangay kan nasabing banwaan kabale an Quirangay, Anoling, asin Sua.
Sa presente nagtitinir an mga inebakwar sa Camalig Bungkaras Evacuation Center asin Tagaytay Elementary School.
Igwa man nin inestablisar na border control points sa Barangay Quirangay asin Anoling kun sain may i-deneploy na saindang personahes na nagmo-monitor sa naunambitang mga lugar.
Dugang kaini na nakaeksperyensya sinda nin light ashfall durante kan pag-alburoto kan Mayon.
Padagos an pagiromdom kan opisyal na ipigbabawal man liwat an paglaog sa 6-kilometer permanent danger zone kan bulkan asin pig-abisuhan an mga residente na dae muna magpirit na magbalik sa saindang mga harong urog na an mga yaon sa apektadong barangay.
