Ipigduon kan House prosecution na kaipuhan man liwat na maipaliwanag ni Vice President Sara Duterte an suboot P463.04-milyong yaman maski halion sa kwenta an mga asset kan mga kumpanyang pigkokonektar saiya asin sa esposo na si Atty. Manases “Mans” Carpio.
Segun ki House prosecution spokesperson asin Rep. Zia Alonto Adiong, an kantidad kan parte nin P817.87-milyong tantiya kan forensic accounting expert na si Atty. Alexander Cabrera sa suboot dae idineklarar na asset asin dae maipaliwanag na yaman kan mag-agom puon 2022 hanggang 2025.
Marurumduman na kaibanan sa sinuri ni Cabrera ang mga bank deposit, ari-arian, posibleng dae idineklarar na interes sa mga kumpanyang Metro City Chow Foods Corp., Gencorp Industries Inc. asin Cale88 Foods Corp.
Enot na man na kinuwestyon kan depensa kun dapat isabay sa personal na yaman kan mag-agom an mga asset asin transaksyon kan mga kumpanyang ini.
Segun sa prosecution, may mga deposito man suboot na dae nakalaag sa Statement of Assets, Liabilities and Net Worth o SALN ni Duterte, siring man an pagkakaiba sa saiyang idineklarar na ganansya asin iba pang financial records.
Sa ibong kaini, alegasyon pa sana an P463-milyong kantidad asin bako pa ini pinal na napapatunayan kan Senate impeachment court.
Pinahimutikan man ni Duterte an mga akusasyon asin kinuwestyon kan saiyang abogado an ebidensya kan prosekusyon.
An Article II, na nagtutukar kan suboot dae maipaliwanag na yaman, na sana an natatada sa impeachment case makalihis bawion kan House prosecution an tulo pang reklamo.
Pinaglalaoman man na pupuunan kan depensa an paglalahad kan ebidensya sa liwat na pagdangog sa Nobyembre 9.
