LEGAZPI CITY-Uminabot na sa rekord na US$64 bilyon an exports kan Pilipinas sa enot na walong bulan kan 2026, huli sa paglago kan electronics asin semiconductors industry.
Huli digdi, pigbubusol kan gobierno an mas darakulang puhunan sa chip design, engineering asin research.
Segun kay Executive Secretary Ralph Recto, an pamayo sa Semiconductor and Electronics Industry Advisory Council (SEIAC), patunay suboot ini kan padiit-diit na paghewas kan papel kan ng Pilipinas sa global technology supply chain, gikan sa manufacturing asin assembly pasiring mas halangkaw na lebel kan teknolohiya.
Basado sa Philippine Statistics Authority, nag-abot sa US$9.1 bilyon an exports kan Agosto sana, pinakahalangkaw sa laog nin 35 taon.
An Electronics products, pigbibilog nin 68 porsiyento katumbas kan US$6.2 bilyon.
Poon Enero sagkod Agosto, naglago nin 26.2 porsiyento an electronics exports asin nagabot sa US$37.1 bilyon.
Nagtetenir na pangenot na destinasyon an United States, na uminangkat nin US$12.3 bilyon kan produktong Pilipino.
Piglangkawan man kan SEIPI sa 10% an forecast na paglago kan electronics exports ngonian na taon, sa tahaw kan naglalangkaw na demand kan artificial intelligence (AI) asin data centers.
Kabali sa mga piglalaoman na makakapakusog sa industriya, iyo an plano kan Toshiba na pahiwason an mga operasyon kaini sa Pilipinas sa laog kan masunod na tulong taon, na piglalaomang makakaprodusir nin 3,000 na trabaho.
An bagong roadmap kan industriya target an taonan na mga export na maabot sa US$110 bilyon sa taon 2030, kaiba an pagpahiwas kan asembliya, pag-eksamin, asin pag-impake nin mga semiconductor, siring man an mga serbisyo sa paggibo nin mga electronics.
An Luzon Economic Corridor asin mga planong technology hub sa manlaen-laen na parte kan nacion, piglalaoman man na makakamukna nin mas dakol na trabaho, bilang parte kan mga paghihingoa na makaakit nin mas halangkaw an kantidad na mga pamumuhunan asin mapalawig an mga oportunidad para sa mga obrero na Pilipino.
