Pigsierto kan Albay Provincial Social Welfare and Development Office (APSWDO) na preparado an gobyerno probinsyal na magtao nin ayuda sa mga pamilyang maapektaran kan Super El Niño.
Segun kay Dr. Eva Grageda, focal person kan APSWDO, an saindang preparasyon iyo an pagkonsolida kan mga report hale sa mga LGUs sa paagi kan Municipal and City Social Welfare and Development Offices tanganing maaraman kun sisay an mga apektado.
An datos ipipresentar kay Governor Noel Rosal para sa tulos na pagtao nin tabang.
Igwa nin regular na programa an APSWDO arog kan tabang pinansyal asin food assistance sa paagi nin bagas para sa mga apektadong pamilya – kabale an mga paraoma, parasira, asin mga drayber nin jeep asin tricycle.
Nagpaluwas na sinda nin mga payout kan Agosto asin Setyembre para sa mga naapektaran kan krisis, sa tabang kan Sangguniang Panlalawigan sa pamamayo ni Vice Governor Diday Co.
Apwera sa tabang sa panahon nin kalamidad, igwa man sindang programa na inaapod na Aid to Individuals in Crisis Situation (AICS) para sa medikal, ospital, asin emergency services.
Segun kay Grageda, naka-standby an Gobyerno Probinsyal kan Albay para sa El Niño, kun sain kabale an Bicol Region sa limang pinaka-preparado na rehiyon.
