LEGAZPI CITY- Nagdara nin pagkahadit pa ra sa mga nasa student publication an mga nangyayaring panggagadan sa mga media personalities.
Ini an kasunod kan pambabadil-gadan sa sarong mamamahayag sa banwaan kan Daraga, Albay.
Segun ki The Bicol Universitarian Editor-in-Chief Joshua Orante sa intrevista kan Bombo Radyo Legazpi na dae maibitaran na magdara nin pagkahadit an nasabing mga insidente urog na para sa mga nagmamawot man na maglaog sa kinaban kan media.
Dagdag pa kaini na makamundo man na bako na bago sa nacion an mga nangyayaring pag-atake sa mga peryodista.
Pighihiling man ining pagsupil sa kalayaan sa pamamahayag.
Katakod kaini, nangapudan si Orante sa mga otoridad na tawan pa nin mas mahigot na seguridad an mga mamamahayag ngani na maibitaran an kaparehong mga insidente.
Mientras tanto, ipinundo man ni Orante na dae man dapat malingawan kan mga mamamahayag kun ano ba an papel na pigagampanan ninda sa komunidad.
