LEGAZPI CITY—Karsel an bagsak kan sarong dating security guard makalihis sirbihan nin 17 warrant of arrest huli sa kasong pang-aabuso sa Barangay Bitano, Legazpi City.
Binisto an akusado na si alyas “Roy”, nasa legal na edad, dating security guard, may agom asin pigkonsiderar na Rank No. 3 City Most Wanted Person kan nasabing ciudad.
Sinirbihan ini nin mga warrant of arrest para sa siyam na kasong pagbalgar sa Art. 266-A (2) kan Revised Penal Code na inamyendahan kan Republic Act 8353 o Anti-Rape Law of 1997, na katakod kan Sec. 5(b) Art. III kan Republic Act No.7610 o Special Protection of Children Against Abuse, Exploitation and Discrimination Act, asin piyansang P180,000.
Afuera digdi, sinirbihan man ini nin mga warrant para sa limang kaso nin Statutory Rape asin tulong kaso nin Lascivious Conduct sa irarom kan Sec.5 (B) kan Republic Act No. 7610 na gabos warang pigrekomendang piyansa.
Pinangenotan an operasyon kan Legazpi City Police Station (lead unit) katabang an 1st Leyte Provincial Mobile Force Company na isinagibo sa bisa kan mga warrant of arrest na iniluwas kan korte sa Legazpi City na may petsang Pebrero 20, 2024.
Dinara sa kustodiya kan Legazpi CPS an akusado para sa dokumentasyon asin magkakanigong disposisyon antes ihampang ini sa korte.
