LEGAZPI CITY- Naging produktibo an ginibong pakikipag-meeting kan League of Municipalities of the Philippines (LMP) Albay Chapter kasabay an mga representante kan Albay Electric Cooperative, kan Oktubre 7.
Basado sa impormasyon na ipigheras kan Presidente kan liga kan mga alkalde kan Albay na si Mayor Caloy Baldo, napagkasunduan kan duwang lado na hasta sa katapusan na sana kan Oktubre an haros tulong beses kada semana na naeeksperyensyahan na brownout sa provincia.
Nadiskutir man an mga pigpapaotob na proyekto para sa upgrading kan mga linya nin kuryente asin probisyon nin subsidy sa mga komunidad para masiguro ang padagos na suplay.
Tinawan man nin direktiba an ALECO dapit sa pagiging aktibo, klarado asin marikas na pagpapaabot nin abiso asin impormasyon sa publiko dapit sa mga scheduled power interruptions asin emergency repairs.
Kinakaipuhan man suboot na masierto na pirmihan na bukas an linya kan komunikasyon ngani na marikas na maipaabot kan konsumidores an mga bagay na nangangaipo nin aksayon.
Sa paagi kan nasabing lakdang, naglalaom an mga alkalde na mareresibe kan mgakonsumidores an karapat-dapat na serbisyo para sainda.
