LEGAZPI CITY-Gadan an sarong 60-anyos na lalaki makalihis an pananaksak sa Barangay 24, Rizal, Legazpi City, kan Miyerkules, Oktubre 7.
Segun sa report kan Legazpi City Police Station, alas 7:45 nin aga nangyari an insidente.
Nagluluwas sa inisyal na imbestigasyon, pasiring suboot an biktima sa saiyang aking babayi kan kinomprontar asin sinaksak kan suspetsado an biktima.
Tulos man na nagresponde an mga pulis sa lugar asin inarestar am suspek na sarong 37-anyos na construction worker.
Dinara an biktima sa Tanchuling Hospital para sa asistencia medical, alagad alas 8:45 nin aga, idineklara na ining gadan. Nagluluwas sa inisyal na imbestigasyon na posibleng personal grudge an motibo kan krimen.
Nasa kustodiya ngunyan kan mga otoridad an suspek mantang inaandam na ang mga dokumento asin ebidensiya para sa pagsangat kan magkakanigong kaso.
Nagpapadagos pa an imbestigasyon kan mga otoridad para maaraman an kumpletong sirkumstansiya kan insidente asin masierto an magkakanigong legal na aksyon.
