LEGAZPI CITY- Naglangkaw nin haros 50% an dengue cases sa Albay puon Enero hasta sa enot na parte kan Setyembre ngunyan na taon, kumparar sa kaparehong peryodo kan 2025.
Segun ki Incident management team for dengue alert spokesperson Engineer Al Barizo sa intrevista kan Bombo Radyo Legazpi na basado sa datos hasta Setyembre 8, igwang 1,785 an tinamaan nin dengue sa provincia asin 14 sa mga ini an binawian nin buhay.
Padagos man na pighahalat an datos kan iba pang posibleng dengue cases na dae pa naire-report hasta sa ngunyan.
Sa nasabing numero 1, 352 an na-admit sa ospital o katumbas nin 76% asin 24% man an dae dinara sa ospital.
Dagdag pa kan opisyal na an Legazpi City asin nagkapira pang lokal na gobierno an nasa above epidemic threshold mantang an iba an nasa below alert.
An kalibugan na kaso sa provincia kan Albay an nakaabot man sa above alert threshold alagad dae pa man nag-aabot sa epidemic threshold.
Huli digdi, nangapudan si Barizo sa publiko asin sa mga lokal na gobierno na makipagtabangan sa mga lakdang ngani na mapuho an dengue cases sa provincia.
