LEGAZPI CITY-Isinalang na sa cross-examination kan defense counsel na si Atty. Justin Nicol Gular sa nagpapadagos na impeachment trial si PSA Assistant National Statistician Marizza Grande mapadapit sa pagtukar kan Article I na igwang kinaaraman sa confidential funds sa Office of the Vice President sa irarom ni Vice President Sara Duterte.
Inako man ni Grande na posibleng igwang mga dai nairerehistrong birth, marriage, asin death records sa nacion, kaya kinakaipuhan ninda an registration programs sa mga lugar na igwang hababang talaan.
Sa pagpapadagos kan impeachment laban ki Bise Presidente Sara Duterte ngonian na aldaw nin Lunes, ipinaapod kan prosekusyon kan Kamara an bagong testigo na si PSA Assistant Grande ngani simbagon an mga kahaputan na may relasyon sa mga suboot indibidwal na tinawan nin confidential funds.
Sinasabi kan piskalya na an mga opisyal kan PSA, pig-iiba sa mga testigo huli sa suboot salang paggamit kan confidential funds, huli ta nagkondusir sinda nin pag-aadal na nagpahiling na an mga pangaran na nakasurat sa mga acknowledgment receipts, na pigmidbid nindang si Mary Grace Piattos an dai namundag, dai nag-agom, asin dai nagadan sa Pilipinas huli ta wara sindang opisyal na rekord sa Philippine Statistics Authority (PSA).
Dugang pa ninda, na sa paagi kaini maipapahiling ninda na peke asin “fictitious” an mga nasabing indibidwal, na nagpapatunay na nagkaigwa nin manipulasyon asin salang paggamit kan pondo kan publiko.
An testimonya ni Grande nag-ikot sa Article 1 kan kasong impeachment na nag-aakusar kay Vice President Sara Duterte Bise nin pagbalgar kan ley huli sa sistematikong salang paggamit asin bakong tamang liquidation kan confidential funds, na nagkakantidad nin P500 milyones sa Office of the Vice President (OVP) asin P112.5 milyones sa Department of Education (DEPED).
Kasabay kaini, pigsusugo man kan Senate impeachment court an empleyado kan Commission on Audit (COA) na si Bresilio Sabaldan, DepEd Assistant Secretary Sunshine Fajarda, asin Police Major Jovelyn Magay, na magtestigo sa impeachment trial poon Setyembre 7 hasta 9.
