LEGAZPI CITY-Nagpatanid liwat sa publiko an Environmental group na Ban Toxics kontra sa mga hazardous chemicals asin safety threats na dara kan nagkapirang dekorasyon sa pasko arog kan Christmas lights ngonian na naglaog na an “Ber” months asin binababa na an mga dekorasyon an merkado.
Segun ki Ban Toxics Advocacy and Campaign Officer Thony Dizon, na importante an pag-inspeksyon kan label asin kumpletong impormasyon kan produkto nganing mahiling kun ligtas an mga ginamit na materyales asin kun an produkto nagsusunod sa national safety standards.
Partikular na nagpatanid si Dizon sa mga kunsumidores na magbakal nin mga substandard na Christmas lights huli ta posibleng mag-init ini asin magin kawsa nin kasulo sa mga harong.
Pigpagirumdom man kan opisyal na bako sana presyo o magayon na disenyo an dapat na basehan sa pagbakal, alagad dapat pirming hanapon kan kinakaipuhan na Import Commodity Clearance (ICC) sticker o katumbas na product standard markings.
Pig-eenganyar man kan grupo an publiko na likayan an mga produktong warang malinaw an pinaghalean o mga materyales na posibleng makaraot sa salud kan pamilya asin kapalibutan.
