LEGAZPI CITY- Aminado an Bicolano na si Wilfredo Bonaobra na bako madali an proseso antes na maideklarar bilang Regional Winner sa 2026 Ten Outstanding Students of the Philippines (TOSP) kan Rehion V.
Sa nasabing honra, pighihiling an academic achievement, leadership, asin social responsibility asin kun ano an nagin impact kaini sa komunidad.
Sa intrevista kan Bombo Radyo Legazpi ki Bonaobra, sinabi kaini na dae niya pigpensar na mapapabali siya asin manggagana sa nasabing halangaw na award giving body.
Pag-istorya kaini na inspirasyon niya an saiyang namaaram na ama na sarong paraoma.
Nareyalisar suboot niya an importansya kan pagtatanom kaya iyo an nagin motibasyon niya sa pagbali sa manlain lain na mga plataporma, ngani na maihayag an mga pinag-aagihan kan mga paraoma.
Saro sa mga programa ni Bonaobra an pagbubusol kan paggamit nin mabaskog na snacks para sa mga kaakian na hasta 1,000 days old kun sain an mga ingredients kaini an hali mismo sa lokal na paraoma asin bako hali sa mga darakulang kumpanya.
Katabang kaini an nutrition council kan Tabaco City sa nasabing programa.
Dagdag pa kaini na kaibanan sa mga pighahanap kan Department of Science and Technology an mga lider na igwang impact sa buhay kan mga namamanwaan asin komunidad.
