LEGAZPI CITY-Nagsangat liwat nin bagong kaso an Office of the Ombudsman sa Sandiganbayan laban kay dating Ako Bicol Party-list Representative Zaldy Co asin nagkapirang opisyal kan Department of Public Works and Highways (DPWH).
Sa opisyal na pahayag, kinumpirmar kan Ombudsman an pagsangat nin kaso kontra sa mambabatas kaiba an nagkapirang opisyal kan DPWH.
Basado sa impormasyon, nagsangat nin kaso an Ombudsman sa pagbalgar kan Section 3(e) kan Republic Act No. 3019 o kan Anti-Graft and Corrupt Practices Act, asin Malversation of Public Funds through Falsification of Public Documents sa korte kan Sandiganbayan.
Sinangat an mga kaso kontra sa dating mambabatas asin iba pa, matapos na determinaran kan Ombudsman na igwa nin ‘probable cause’ na kasuhan sinda.
Nag-ugat an mga kaso sa suboot pagkaimbwelto ninda sa anomaliyang P77 milyones pesos na flood control project sa Balagtas, Bulacan.
Mantang an dating Public Works Engineer na si Henry Alcantaram, na enot nang kabali sa mga pangaran na kakasuhan, dae na kinasuhan huli ta nasa irarom na ini kan Witness Protection Program.
