Pinuunan na kan Department of Agriculture (DA) an pag-imbestigar sa mga imported na karneng urig ngani na maaraman kun naaapektaran asin nalulugi an mga lokal na producers.
Segun ki Agriculture Secretary Francisco Tiu Laurel Jr., igwa sindang nahiling na rason ngani na imbestigaran ini sa irarom kan Safeguard Measures Act.
Sakop kan imbestigasyon an mga fresh, frozen, asin iba pang produktong urig puon kan 2021 hasta Agosto 2026.
Nagkapira sa mga nahiling na rason kan imbestigasyon an pagbaba kan ganansya asin presyo kan ipigpapabakal kan mga local producers, magin an pagdakol na mga nakatambak na imported na karne sa nacion.
Nilinaw man kan ahensya na wara pang ipinataw na dugang ba buwis o taripa sa ngunyan.
Kaipuhan muna ining pag-adalan nin marhay ngani na patunayan kun an mga imported na produkto talaga an rason kan kadifisilan kan mga local producers.
Kadaklan sa mga inangkat na karne an hali sa European Union (EU), maging sa Brazil, Spain, Canada, Netherlands, asin Estados Unidos.
Nakikipag koordinar na man an DA sa Department of Foreign Affairs ngani na abisuhan an mga nacion na ini asin hagadon an saindang reaksyon.
