LEGAZPI CITY-Labi sa 450 na mga pasyenteng may leptospirosis an presenteng pigbubulong asin pigtatawan nin atensyon medikal sa manlaen-laen na ospital kan Department of Health (DOH) sa National Capital Region (NCR).
An paglangkaw kan mga naospital na may kaso nin leptospirosis kasunod kan mahiwasang pagbabaha na naeksperyensyahan sa Metro Manila kan mga nakalihis na aldaw.
Basado sa pinakahuring quick count kan Health Emergency Management Bureau kan DOH, nasa 856 na kaso nin leptospirosis an nairehistro sa bilog na nacion poon Enero 4 hasta Agosto 22 ngonian na taon.
Mantang mas hababa ini nin 66 porsyento kumpara sa 2,546 na kaso na nairekord sa kaparehong peryodo kan nakaaging taon, padagos an pag-iingat kan ahensya sa posibleng paglangkaw kan kaso huli sa 15-day incubation period kan bacteria.
Sienerto man kan ahensya na preparado na an mga pampublikong pasilidad asin igwa nin mahigot na monitoring nganing marikas na maareglo an pagbalyo kan mga pasyente kun kinakaipuhan.
Sa paagi kan lakdang na ini, maibitaran suboot an pagdakol o labi-labing paglangkaw kan numero kan mga pasyente sa sarong ospital, asin paramientras na mantinido an supisyenteng supply kan kinakaipuhan na bulong para sa gabos na apektado.
