Dinepensaran kan Malacañang an pagdesignar sa sarong Gen Z ‘jet-setter’ bilang pamayo kan komisyon kan urban poor makalihis an mga pagtuyaw asin pag-alma kan publiko.
Marurumduman na nanumpa kan Lunes si Zofia Canlas bilang bagong commissioner kan Presidential Commission for the Urban Poor (PCUP) — sarong posisyon na namamayo sa isyu kan pagkaon asin pabahay sa nasabing sektor.
Nakaresibe nin manlain lain na reaksyon hali sa publiko an pagkaka designar kan opisyal, kun sain tinuyaw kan netizen an mga ladawan ni Canlas na nagpapahiling nin marangyang pamumuhay.
Kaibanan pa digdi an pagsusulog kaini nin designer brands asin pagbabakasyon sa Europe asin Estados Unidos.
Segun ki Presidential Communications Undersecretary Claire Castro na bako na bago ki Canlas an nasabing mandato.
Dugang pa niya na dae basta-basta nagdedesignar an presidente nin uyon sa sosyo-ekonomikong katauyan kan sarong persona.
“Kung ikaw ay may kakayanan na magtrabaho, magsilbi para sa bayan, iyan po ang Numero Uno para sa pangulo — ang totoo at dedikado, may dedikasyon na makapagsilbi sa bayan,” segun ki Castro.
Mientras tanto, nagpaabot man nin sentimyento an youth group na Akbayan Youth dapit sa pagdesignar ki Canlas sa nasabing posisyon.
“Congrats, Commissioner! Ang bilis ng akyat mo. Nagtapos ka ng Biology noong 2024, at ngayon ikaw na ang mukha ng ahensyang dapat ay boses ng mga pinapalayas sa sarili nilang tahanan.Samantalang ang community leaders na ilang dekada nang nilalamon ng demolisyon, ni upuan sa waiting area, hindi mabigyan,” basado sa sarong pahayag.
Nagtapos sa De La Salle University Manila an 27-anyos na si Canlas kan 2024.
Nagdalagan man siya bilang representante kan Batang Quiapo party-list kan 2025 midterm elections antes ini naging chief-of-staff kan PCUP kan Hulyo ngunyan na taon.
Basado sa website kan Office of the President, nagserbi bilang assistant secretary sa irarom kan Office of the Executive Secretary an saiyang ama na si Jose Marcell Canlas.
Para sa presenteng taon, nasa P250 milyon an nakatagamang pondo para sa komisyon kun sain P89.35 milyon an mapapasiring sa pagpapa sweldo kan nasa 163 kaining tauhan, kaibanan an P8 milyon na pagpapasweldo sa apat kaining komisyoner mantang P2.5 milyon man para sa taunang pampasweldo para sa chairperson kaini.
