LEGAZPI CITY-Nakatalaan si Lea Salonga na mag-resibe kan saiyang sadiring Hollywood Walk of Fame star sa Setyembre 4 sa Hollywood Boulevard sa Los Angeles, California.
Susog sa Manila International Film Festival, an star na ini, iyo an ika-2,855 na star na itatao sa sarong artista asin an pinakaenot na itinatao sa sarong Pilipino. Si Lea makakaresibe kan saiyang Hollywood Walk of Fame star sa kategoryang Live Performance.
Apwera ki Lea, si Nicole Scherzinger asin Jo Koy nakatalagang mag-resibe man kan saindang sadiring mga star sa 2027.
Kan Agosto, si Lea pig-perform an kantang “Reflection” asin “A Whole New World” sa “Disney Princess: The Ultimate Concert Celebration” sa Anaheim, California.
Bilang sarong alamat kan Disney, si Lea parte kan selebrasyon kan ika-20 anibersaryo kan Hong Kong Disneyland, kun saen siya nagtugtog nin mga iconic na kanta gikan sa Disney franchise.
Kan 2025, nagbalik siya sa entablado kan teatro sa Pilipinas ngani magganap kan The Witch sa lokal na produksyon kan “Into the Woods.”
Siya man an nagganap bilang Madame Thénardier sa “Les Misérables: The World Tour Spectacular” ngonian na Enero 2026.
