Kinumpirma kan Department of Education (DepEd) na nadistroso an nasa 2,424 classrooms huli sa epekto kan bagyong Maymay asin habagat.
Basado sa datos kan Disaster Risk Reduction and Management Service kan DepEd, nasa 403 an nawasak, 505 an matinding nadanyaran asin nasa 1,516 an nagsapar nin minor damage.
Kaibanan sa mga naapektaran an mga classrooms sa Ilocos Region, Cordillera Administrative Region asin Central Luzon.
Afuera digdi, inihayag man kan ahensya na igwang mga kagamitan an nadistroso siring kan mga tukawan, information and communications technology equipment units asin learning materials, na naka apektar sa mga apektadong lugar.
Mientras tanto, segun sa DepEd DRRMS, mangangaipo nin labi sa P74 milyong pondo para sa pagpapakarahay kan nasa 1,516 classrooms na nagsapar nin danyos.
Bilang kasimbagan, sinabi ni Education Secretary Sonny Angara na ilalansar kan ahensya, kaibanan an Department of Labor and Employment (DOLE) an pagtipon kan 2026 Tulong Panghanapbuhay sa Ating Disadvantaged Workers-Brigada Eskwela sa immediate disaster cleanup mechanism para sa pagpapakarahay kan nasabing mga classrooms.
