LEGAZPI CITY- Nagpatanid an grupo nin mga paraoma sa potensyal na pagluya kan produksyong agrikultural huli sa super El Niño, kasabay kan paghadit na kulang asin dae napapanahon an ayudang nareresibe kan mga paraoma.
Segun ki Samahang Industriya ng Agrikultura (SINAG) Executive Director Jayson Cainglet, sa intrevista kan Bombo Radyo Legazpi, dakul na mga paraoma an dae nakapagtanom huli sa epekto kan habagat asin soboot pagkaatraso sa distribusyon kan mga agricultural inputs, siring man sa fuel asin fertilizer subsidy.
Huli kaini, pig-aantisipar niya na mas dakulang kadipisilan an mapapaatubang sa sektor mantang nagdadangadang an mas grabeng epekto kan El Niño.
Pigkwestyon man ni Cainglet an pagsarig sa importasyon bilang simbag sa posibleng kakulangan nin suplay.
Paliwanag kaini na dapat tawan nin prayoridad an direktang suporta para sa mga lokal na paraoma tanganing masusteniran an produksyon asin maprotehiran an saindang kabuhayan.
Pigduon man kan opisyal an pangangaipo na bantayan bako sana an mga volume kan suplay kundi pati na an mga presyo sa farmgate asin retail market. Ipigpaliwanag niya na an mga prodyuser pwedesr mag-ako nin hababang presyo mantang an mga presyo sa merkado an nagtetenir na halangkaw—sarong sitwasyon na nagpapagabat sa mga paraoma asin mga konsumidor.
Mientrastanto, sinabi kan Department of Agriculture na nag-aandam sinda nin mga lakdang tanganing mapagaan an epekto kan El Niño, kabali na an pagdistribwer nin mga binhi asin abono, subsidiya sa gasolina, asin an pagpahiwas kan mga programa na direktang nagkokonektar sa mga paraoma sa mga konsumidor.
Para sa SINAG, an marikas na pagresponde kan gobyerno sa mga apektadong paraoma, siring man an saindang kakayahan na magtanom giraray asin magmantenir nin mga hayop sa tahaw kan matinding kan panahon, magseserbing krusyal na lakdang nin pagigin andam.
