LEGAZPI CITY—Tinawan-doon kan Philippine Institute of Volcanology and Seismology na maikokonsiderar na aftershocks kan nakalihis na 5.3 magnitude na linog na nagtama sa banwaan kan Sto. Domingo, Albay kan Hunyo 5, an mga presenteng nairerehistrong linog sa provincia.
Segun ki PHIVOLCS Seismological Observation and Earthquake Prediction Division Chief Dr. Winchelle Ian G. Sevilla, sa intrevista kan Bombo Radyo Legazpi, dae man mahaloy pa nin mga pirang bulan an nasabing mga aftershocks alagad pwedesir pang maeksperyensyahan ini nin pirang aldaw o semana.
Segun saiya na kadaklan sa mga aftershocks an saradit sana asin dae man haros namamatean kan namamanwaan.
Dugang kaini na basado sa saindang namo-monitor na aktibidad an wara man sindang nahihiling na magkakaigwa nin mas makusog na linog kaysa sa 5.3 magnitude kan nakalihis na bulan.
Bago pa man nangyari an 5.3 magnitude na linog, an nakapagrehistro na man an saindang ahensya nin swarms sa provincia.
Pighayag pa ni Sevilla na dati an siring na mga pangyayari an sainda man na pighihiling kun hudyat na maputok liwat an bulkang Mayon.
Nilinaw kan opisyal na prone an Pilipinas sa mga linog huli sa nakabugtak ini sa Pacific Ring Of Fire.
Mientrastanto, katakod kaini abiso man niya sa publiko na paghilingon an structural integrity kan mga edificio, makisumaro sa earthquake drill nganing may ideya kun ano an pwedesir gibohon en kasp may makusog na pagyugo asin magkua sanang impormasyon sa mga otorisadong ahensya, local government units, asin saindang media partners nganing malikayan an fake news mapadapit sa linog.
