LEGAZPI CITY-Nakatalaan na magabot sa nacion ngonian na aldaw, Hunyo 21, an nasa 24 na Pilipinong pinalaya sa kulungan sa Russia makalihis an personal na pakikipag-olay ni President Ferdinand R. Marcos Jr. kay Russian President Vladimir Putin.
Segun sa Department of Foreign Affairs (DFA), nagbiyahe an mga Pilipino hale sa Krasnoyarsk, Russia pasiring sa Bangkok, Thailand, kun saen sinda babangaon sa duwang batch bago mag-biyahe pauli sa Maynila sa paagi kan Philippine Airlines.
Sa presente, nakaabot na an enot na anom na Pilipino sa Ninoy Aquino International Airport (NAIA) Terminal 1 kasubagong alas-12:05 nin hatinggabi lunad kan Flight PR 737, mantang an natatadang 18, piglalaoman na makakalapag sa nacion poco mas o menus alas 4:05 nin maagahon.
Napag-araman man na haros siyam na bulan nang nakalulong an mga Pinoy na ini sa Irkutsk, Russia nin warang pormal na kasong pigkakahampang.
Napalaya an mga ini makalihis an apela ni Presidente Marcos kay Russian President Vladimir Putin sa nakalihis na sidelines ng ASEAN-Russia Commemorative Summit sa Kazan.
Susog sa Presidente, nirepaso kan mga otoridad sa Russia an kaso asin kinumpirmang warang pigbayolar na ley an mga Pilipino kaya tulos sindang ipigsugo na palayaon asin i-deport pabalik sa Pilipinas.
Nakahanda na manb suboot an mga ahensya kan gobierno ngani magtao nin tabang asin asistensya sa mga nagbalik na Pilipino sa saindang pag-abot sa nacion.
