LEGAZPI CITY-Nakatalaang isubasta kan Bureau of Internal Revenue (BIR) an apat na luxury cars na kad-sadiri kan mga Discaya.
Segun sa BIR na gigibohon an auction sa maabot na Hunyo 29 sa National Office sa Quezon City.
Kinabibilangan ini kan Mercedez-Benz Sprinter 2017; Range Rover LWT 2019; Land Rover Defender 130S 2023 asin Mercedez Benz GLS 350T AMG 2020.
An mga behikulo na ini, mababakal hale sa St. Gerrard Construction General Contratctor and Development Corporation.
Nagkakantidad nin kabilugang P26.14 milyon an gabos na nabanggit na mga behikulo.
Paliwanag ni BIR Commissioner Charlito Martin-Mendoza na obheto kan auction an maparikas an pagkulekta kan mga buwis asin maibitaran an padagos na pagbawas sa kantidad kan mga behikulo mantang ini nasa kustodiya kan gobierno.
Marurumduman na kan Marso, ipinasakamot na kan Bureau of Customs an P102 milyon sa Bureau of Treasury.
An nasabing kantidad, hale sa auctions kan siyam sa 13 nakumpiskang behikulo kan mga Discaya.
Magigiromduman an mag-agom na contractor sina Pacifico asin Cezarah “Sarah” Discaya, an naarestar huli sa pagkakaimbuelto sa anomalya kan mga flood control projects sa Department of Public Works and Highways (DPWH).
