LEGAZPI CITY-Padagos na pigbabantayan kan Philippine Institute of Volcanology and Seismology (PHIVOLCS) an epekto kan 7.8 magnitude na linog na nagtama sa Mindanao kan Hunyo 8, 2026.
Basado sa pinakahuring report kan ahensya kan Hunyo 15, 2026, igwang total na 6,058 aftershocks an nai-rehkord sa lugar.
Sa bilang na ini, nasa 1,451 an na-plot o natukoy mantang 78 an namatean kan publiko.
An magnitude kan mga aftershocks nagpoon sa 1.2 hasta 6.4.
Segun sa mga eksperto, an offshore Sarangani earthquake an saro sa pinakamakusog na nairehistro sa rehiyon sa mga nakaaging taon.
Ini an nagin rason kan temporaryong pag-ebakwar kan mga residentes sa mga coastal areas huli sa huma nin tsunami, maski ngani hinale na an advisory.
Bistado an Sarangani Bay asin pagtaraid na mga probinsya na parte kan Cotabato Trench, na sarong aktibong fault system na pirmihang nagkakawsa nin makusog na linog sa Mindanao.
Kan 2019, sunod-sunod na magnitude 6+ na linog an nagtama sa Cotabato asin Davao Region, na nagkawsa man nin danyos sa mga edipisyo asin kabuhayan.
Sa ibong kan nagpapadagos na mga aftershocks, pigsierto kan PHIVOLCS na wara nin mahihiling na senyales nin volcanic activity na may koneksyon sa linog.
Alagad, pinapagiromdom an publiko na magtenir na preparado asin magsunod sa mga advisories kan lokal na gobierno.
