LEGAZPI CITY-Pigkokonsidera kan National Bureau of Investigation (NBI) na “person of interest” si Senador Robin Padilla katakod kan pagkawara ni Senador Ronald “Bato” dela Rosa makalihis ining maghale sa Senado kan Huwebes, Mayo 14, 2026.
Segun kay NBI Director Melvin Matibag, si Padilla suboot an huring nahiling na kaiba ni Dela Rosa bago ini tuluyang mawara sa laog kan Senate premises.
Dagdag pa niya, awtomatikong kaiba si Padilla sa mga dapat haputon ngani malinawan an lokasyon ni Bato.
Naghale si Dela Rosa sa Senado pirang oras makalihis an tensyon asin nairehistro na putukan sa laog kan edipisyo kan Miyerkules nin banggi, mantang nasa irarom kan “protective custody” kan Senado an Senador.
Ini may kinaaraman sa warrant of arrest na pig-siyu kan International Criminal Court huli sa kasong crimes against humanity katakod kan war on drugs kan nakalihis na administrasyong Duterte.
Sinabi man ni Matibag na igwang hinala an nagkapirang ahente kan NBI na posibleng ginibong “diversion” an nangyaring putukan ngani makatakas si Dela Rosa.
Segun pa sa opisyal, magin an agom kan senador nagsabing sinamantala kaini an kariribukan ngani makahale sa Senado.
Padagos man na nakikipag-koordinar an NBI sa Department of Justice mantang nagpapadagos an imbestigasyon sa insidente asin sa posibleng lokasyon ni Dela Rosa.
