LEGAZPI CITY-Maabot sa 215 miyembro kan Kamara de Representantes an nagpapahiling suboot nin suporta sa impeachment ni Vice President Sara Duterte, susog kay Bicol Saro party-list Rep. Terry Ridon.
Katumpad ini kan nagin numero sa enot na impeachment case laban sa Bise Presidente kan nakalihis na taon.
Dagdag pa niya, an nasabing numero, katumpad kan labi 2/3 kan kabilugang miyembro kan Kamara asin haros kapareho kan nagin boto sa nakalihis na impeachment plenary vote.
Sinabi man ni House Deputy Speaker Ronaldo Puno, na pigkakarkulong 180 na kongresista man an posibleng magboto na pabor sa impeachment.
Sa irarom kan 1987 Constitution, bastante na an 1/3 kan House members o dai mababa sa 106 votes ngani maipasar an impeachment asin maipadara sa Senado para sa impeachment trial.
Basado sa report kan House committee on justice na pinamamayuhan ni Batangas Rep. Gerville Luistro, inakusaran si VP Sara nin suboot salang paggamit kan P612.5 million confidential funds asin dai maipaliwanag na P6.77 billion na yaman, afuera sa iba pang mga alegasyon.
Sa kampo kan Senado, sinabi ni Sen. Francis “Kiko” Pangilinan na pinag-iisipan niya an alok na magin “impeachment manager” sa posibleng paglilitis.
Segun saiya, magigin kapareho ini kan sarong clerk of court na mag-aayos asin magpapadalagan kan proseso kan impeachment trial, alaagd wara pang pinal na desisyon mapadapit digdi.
