LEGAZPI CITY-Nanindugan si Atty. Paolo Panelo, an tagapagtaram ni Bise Presidente Sara Duterte, na an Artikulo 6, Seksyon 3(6) kan 1987 Konstitusyon, malinaw na naghahagad nin two-thirds kan boto kan gabos na miyembro kan Senado para sa sarong conviction sa impeachment.
Segun ki Panelo, huli ta 24 an miembros kan Senado, 16 na boto an kaipuhan para sa sarong conviction.
Sinabi niya na sala an desisyon kan impeachment court na ibaba an threshold, huli ta an Senado kulang nin awtoridad na baguhon ini.
Ikinonekta man ni Panelo an desisyon sa due process rights ni VP Duterte, partikularmente an saiyang direchos para sa patas asin impartial na paglilitis.
Huli kaini, sinabi niya na an senate impeachment court nawaran nin legal asin moral na awtoridad na ipadagos an kaso.
Mientrastanto, inakusaran ni Panelo an administrasyon ni Marcos asin nagkapirang senador na pagbaluktot sa ley asin ginagamit an mga kaso asin pagkapreso nganing pugulan an mga senador na nagkokontra sa saindang agenda.
Dugang pa kaini na parte ini kan pagprobar na olangon si VP Duterte manungod sa impeachment proceedings asin sa 2028 elections.
Sa saiyang pahayag, tinawan nin komendasyon ni Panelo an mga senador na nagkokontra sa pagbaba kan threshold asin nangapudan na iprayoridad an nacion kaysa sa pansadiring interes.
