LEGAZPI CITY-Tinawan doon ni U.S. Defense Secretary Pete Hegseth na dai pa tuluyang natatapos an tigil-putukan sa pagitan kan Estados Unidos asin Iran, sa ibong kan magkahiwalay na pag-atake kan duwang kampo sa Strait of Hormuz.
Segun kay Hegseth, pigporbaran suboot kan Iran an pigaapod na “international extortion” sa nasabing ruta, alagad sienerto niyang matatapos ini sa paagi kan planong “Project Freedom.”
Dagdag pa niya, igwa suboot na “red, white and blue dome” na nagpoprotehir sa rutang pandagat, patunay na ligtas suboot an pag-agi kan duwang komersyal na barko kan US poon kan Lunes.
Mientras tanto, nagpatanid man an pangenot na negosyador kan Iran na “nagpopoon pa sana” an saindang lakdang laban sa US.
An planong “Project Freedom” ni US Pres. Donald Trump, obheto suboot na gamiton an US military ngani tabangan asin giyahan an mga na-stranded na cargo ship paluwas kan Strait of Hormuz.
Alagad, tinawan doon kan Iran na kontrolado kaini an nasabing ruta.
Segun sa US, nagpaputok suboot an Iran nin mga missile asin drone laban sa mga barkong militar asin komersyal.
Sa pinakahuring datos, nasa humigit-kumulang 22,500 marino hale sa 1,550 commercial boats an presenteng naiipit sa Gulf huli sa padagos na tensyon sa lugar.
