LEGAZPI CITY—Pighayag kan Philippine Institute of Volcanology and Seismology (PHIVOLCS) na warang signipikanteng pagbabago sa eruption behavior kan bulkan Mayon siring kan nangyari kan nakalihis na Sabado, Mayo 2, alagad nagpapadagos man liwat an lava flow effusion.
Segun ki PHIVOLCS Volcano Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, na an kondisyon sa parte kan Mi-isi gully an nakaimpluwensya sa pag-generate nin dakulang aktibidad kan Pyroclastic Density Currents (PDCs) o uson.
Segun saiya na imbes na maghalaba an pagdaloy kan bagong ipigluluwas na lava kan bulkan na nagsusumikap na mag-agi sa matarik na parte kan Mi-isi gully an nag-collapse ini sa dati nang mga nakatambak asin nakaharang na lava sa nasabing gully.
Dugang niya na dara kan duro-diretsong pag-collapse kan lava an nagresulta sa aktibidad kan PDCs kun sain nagkrear ini nin ‘ash clouds’.
Tinawan-doon kan opisyal na warang nangyaring pagputok o pagsabog sa nasabing bulkan.
Nagpatanid man si Bornas sa publiko na likayan an parte kan Mi-isi asin Binaan Channel na tinambakan kan PDCs deposits huli sa posibleng dara kaining peligro.
Mientastanto, sa ngunyan dae pa ipagkonsiderar an pagtaas sa Alert Level 4 huli sa wara man na paglala sa monitoring parameters sa bulkan, alagad, pwedesir irekomenda an extended danger zone en kaso mautro liwat an siring na aktibidad kan PDCs asin magrayo pa an distansya kan pagdaloy kaini sa Mi-isi gully.
