Posibleng guilty sa election offense si Vice President Sara Duterte kun mapatunayan na nakaresibe siya nin campaign donation hale sa mga Chinese nationals na konektado sa Pharmally segun ki Manila Rep. Joel Chua.
Segun ki Chua, chairman kan House committee on good government and public accountability, malinaw na ipinagbabawal sa Section 81 kan Omnibus Election Code an anuman na kontribusyon hale sa mga dayuhan sa kampanya kan sarong kandidato.
Nagluwas sa supplemental affidavit ni Ramil Madriaga, suboot bagman ni Duterte, na nakaresibe siya nin milyones de pesos gikan sa Pharmally financial officer na si Lin Weixiong asin mga negosyanteng si Maestrado “Tony” Yang asin Michael Yang para sa kampanya ni Duterte kan 2022.
Bisto an mga Yang bilang haraning kaalyado ni dating Presidente Rodrigo Duterte asin konektado man sa mga operasyon kan POGO.
Idinagdag ni Rep. Terry Ridon na an House justice committee nakaabot na sa “probable cause” nganing irekomendar an impeachment kan Bise Presidente, base sa suboot salang paggamit kan confidential funds.
Ini an pigkonpirmar kan Commission on Audit (COA) na nagsugong ibalik an P73 milyon na “disallowed” na funds kan Office of the Vice President.
Mientrastanto, nangapodan si Rep. Bienvenido Abante na mag-atendir na sana si Duterte sa masunod na hearing sa Abril 22 imbes na magtao sana nin pahayag sa media.
Alagad segun sa saiyang abogado na si Paolo Panelo, warang saysay an saiyang pag-atendir huli ta dae tinugutan an mga miembros kan komite na maghapot nin masinsinan.
Dugang pa digdi, pigsugo kan Office of the Ombudsman si Assistant Special Prosecutor Ryan Quilala na ipaliwanag an saiyang lado makalihis na mabanggit siya ni Madriaga kan nakaaging hearing.
