Inanunsyar kan Land Transportation Office (LTO) an tulong bulan na extension para sa gabos na mga lisensya kan driver asin magre-rehistro nin behikulo na nakatalaan na mag-expire.
Segun sa LTO na sakop kan lakdang an mga dokumentong mag-e-expire puon Abril 2026, kung sain pwedesir ining mapalawig nin hasta sa tulong bulan na wara nin multa o penalidad.
Obheto kan polisiya na matawan nin ginhawa an publiko sa tahaw kan paglangkaw kan presyo kan langis asin iba pang pangenot na babarakalon.
Sakop kan extension an driver’s asin conductor’s licenses, student driver’s permits, asin rehistro kan mga behikulo.
Dagdag pa kan ahensya na sa laog kan extended period dae man sisingilon nin dugang na bayadan an mga motorista para sa late renewal.
Pigduon kan LTO na sa paagi kan lakdang, maawot na mapagaan an pasanin kan publiko asin matawan nin bastanteng panahon ngani na makapag renew kan saindang mga dokumento na dae naaapektaran kan dugang na gastos.
