Ipigbubusol sa Kamara de Representantes an propuestog ley na obhetong ipagbawal an pagharang sa mga estudyanteng igwang dae pa nababayadan na obligasyon ngani na maka atendir sa saindang graduation ceremonies.
Sa irarom kan House Bill (HB) 8618 na ipigsunad ni Parañaque City 2nd District Rep. Brian Yamsuan, obheto kaini na siertuhon na gabos na estudyante an mai-eksperyensya an pagtatapos anuman an saindang financial status.
Paliwanag ni Yamsuan na an graduation an sarong importanteng trayumpo bako sana para sa mga estudyante kundi para sa saindang pamilya na nagsakripisyo para sa pag-aadal, kaya dae ini dapat ipagkait huli sana sa pagtios.
Siring man, nilinaw sa propuesto na alagad ipinagbabawal an pagpugol sa pag-atendir sa graduation huli sa utang, pigbibisto man liwat an diretsos kan mga eskwelahan na singilon an mga dae pa nababayadan kan mga estudyante.
Sakop kan nasabing propuesto an gabos na public asin private basic education institutions, higher education institutions, asin technical-vocational schools na may kursong lampas nin sarong taon.
Ngani na maaraman an mga kwalipikadong estudyante na sakop kan disadvantaged, pwedesir na mag-isyu nin certification an local social welfare officer o Department of Social Welfare and Development (DSWD) regional officer sa mga kwalipikadong apektado kan kalamidad, krisis, o iba pang mga rason.
Alagad tutugutan na maka atendir sa graduation, posibleng dae maitao an diploma asin iba pang mga dokumento kan estudyanteng nakapagtapos hasta sa dae nababayadan an saindang utang sa eskwelahan.
Sa irarom kan propuesto, an mga mabayolar an pwedesir na mahampang sa administrative sanctions hali sa Department of Education (DepEd), Commission on Higher Education (CHED), asin Technical Education and Skills Development Authority (TESDA).
