LEGAZPI CITY—Ipigdoon kan Bureau of Fire Protection Bicol na naghalangkaw nin 17% an insidente nin kasulo sa bilog na rehiyon durante kan 1st quarter ngunyan na taong 2026.
Segun ki BFP Bicol Regional Director Fire Senior Superintendent Achilles Santiago, sa intrevista kan Bombo Radyo Legazpi, mantang naghalangkaw an insidente nin kasulo sa presente an naghibaba an nairehistro nindang danyos huli sa namantinir ninda an 7-minutes response time.
Paliwanag ni Santiago na nagbaba an danyos kan kasulo sa ngunyan na nag-aabot sa 66% o katumpad nin labi P28 milyon kumpara kan nakalihis na taong 2025 na nagsakat sa P85 milyon.
Dugang niya na wara man sindang nairehistrong dakulang insidente nin kasulo durante kan pag-obserbar kan Semana Santa.
Katakod man kan summer season, sinabi man kan opisyal na ipapahigot ninda an kampanya urog na sa paglaban asin paglikay kontra kasulo katabang an iba pang ahensya de gobierno.
Mensahe man ni Santiago sa publiko na tulos makipagkoordinar sa saindang opisina en kaso may mga insidente na kinakaipuhang respondehan, asin pigsierto man kaini na preparado sinda 24/7 na maghatod nin serbisyo publiko.
