Wara pang nahihiling na huma an Malacañang nin “energy lockdown” o kakulangan o sa suplay kan kuryente asin krudo sa nacion sa ibong kan nagtitinding labanan sa Middle East.
Segun ki Palace Press Officer Undersecretary Claire Castro na sa presente harayo pa an nacion sa sitwasyon siring kan dekada ’70 na nagkaigwa nin fuel rationing asin carless days.
Segun sa Palace Official, bilang parte kan contingency plan kan administrasyong Marcos, aktibong naghahanap an Department of Energy (DOE) asin Department of Foreign Affairs (DFA) nin mga alternatibong mapagkuwaan nin petrolyo na dae nag-aasa sa Middle East.
Binanggit ni Castro an report ni DOE Undersecretary Sharon Garin na presente nang nakikipag-diyalogo ang Pilipinas sa India, Argentina, asin Canada nganing masierto an padagos na imbentaryo kan krudo sa nacion.
Dugang pa ni Castro, mantang naglalaom an gobierno sa sarong diplomatikong resolusyon sa pagultangan kan mga naglalaban na nacion, dae nagpupundo an Presidente sa paghahanda nganing maibitaran ang anumang worst-case scenario na magpapadipisil sa mga Pilipino.
