LEGAZPI CITY—Timbog an apat na indibidwal sa isinagibong entrapment operation kan mga otoridad makalihis an ilegal na pagpapabakal nin produktong petrolyo sa Barangay Maipon, Guinobatan, Albay.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, nakumpiskar sa mga suspek an marked money, sales invoice, fuel dispenser asin fuel tank kun sain may kabilogang kantidad ini nin P2,320,000.
Napag-araman na warang certificate of compliance an mga suspek, warang authority to operate, asin warang license to operate.
Nahahampang an mga suspek sa kasong pagbalgar sa Batas Pambansa Blg. 33 (BP 33), na inamyendahan kan Presidential Decree 1865 para sa ilegal na pagpapabakal nin produktong petrolyo.
Sa presente nasa kustodiya na kan Guinobatan Municipal Police Station para sa magkakanigong disposisyon.
Mensahe man ni Nuñez sa may mga kagsadiri kan mga gasolinahan na siertohong nagsusunod sa mga rekisitos kan Department of Energy nganing malikayan an anumang bayolasyon na may kinaaraman digdi.
