LEGAZPI CITY-Pigkokonsidera bilang nasa all-time high an presyo kan krudo sa Pilipinas makalihis an ikaduwang bugso kan bigtime oil price hike.
Segun ki Department of Energy (DOE) Secretary Sharon Garin, nairehistro kan departamento an duwang magkasunod na paglangkaw kan presyo kan mga produktong petrolyo sa historya kan nacion.
Sinabi niya na pigkokonsiderar ini ngonian na pinakahalangkaw na sunod-sunod na taas-presyo sa sektor nin petrolyo asin ini an pinakahalangkaw na rekord sa produkto sa bilog na historya.
Idinagdag pa kan kalihim na posibleng mas halangkaw pa an presyo kan krudo sa mga lugar na harayo sa National Capital Region, partikular sa mga lugar na nangangaipo nin mas halawig na biyahe ngani maihatod an suplay kan produktong petrolyo.
Nagin epektibo an enot na bigtime price hike poon kan Marso 10, pirang aldaw makalihis magsiklab an gera sa Middle East kun sain kadakol na nacion an nadamay sa mahiwasang labanan.
Pigpapaotob ngonian na aldaw nin Martes, Marso 17, kan mga kompanya nin langis an ikaduwang bugso kan taas-presyo.
Sa kabilugan haros P50 na an linangkaw sa presyo kan diesel, labi sa P42 sa kerosene, asin labi sa P25 man sa gasolina.
