Ipagpapadagos kan ICI-Technical Working Group for Asset Recovery an pagbawi sa mga hinabon na pondo asin assets hale sa mga imbuelto sa mga maanomaliyang flood control projects.
Ini an maski matatapos an operasyon kan mismong Independent Commission for Infrastructure (ICI) sa Marso 31, 2026.
Segun ki ICI-Technical Working Group chairperson USec. Renato “Aboy” Paraiso, wara pang pormal na anunsyo o direktiba an nareresibi kan grupo gikan sa komisyon, partikularmente hale sa chairman kaini na si retired Justice Andres Reyes Jr., na nagrekomendar na tapuson na an operasyon kan komisyon.
Alagad, parehong dati nang nagpahayag nin suporta an Office of the Ombudsman asin an Office of the Solicitor General para sa pagpapadagos kan technical working group para sa pagbawi kan mga nakumpiskar na mga asset.
Segun ki USec. Paraiso, igwa na sindang nabisto na mga mekanismo na matugot sa gobyerno na mabawi an mga assets na suboot konektado sa maanomaliyang proyekto.
Sa ibong kan nangangaipo an proseso nin mahiwas na imbestigasyon asin pagsubaybay kun saen inilipat an mga pagsadiri, nagtutubod si USec. Paraiso na nagkaigwa na nin progreso an grupo.
Basado sa pinakahuring datus na pinag-olayan sa saindang pagtiripon, uminabot na sa P4.8 billion an kantidad kan mga narekober asin na-freeze na assets.
