Pormal nang ipigsunad kan Office of the Ombudsman an kasong plunder sa Sandiganbayan kontra ki dating House Speaker Martin Romualdez, dating Ako Bicol Representative Zaldy Co, asin iba pa katakod kan suboot anomalya sa flood control kickback scheme, segun sa kumpirmasyon kan Sandiganbayan Judicial Records Division.
Huli sa panibagong legal na lakdang na ini, nangapudan an kampo ni Romualdez nin patas na pagtrato ngani na matawan sinda nin bastanteng tsana na simbago an anuman na panibagong alegasyon na ipigbabato saiya.
Ipigduon ni Atty. Ade Fajardo, legal counsel asin tagapagtaram kan dating speaker, na dapat sana sindang abisuhan kan Ombudsman kun igwang opisyal na pahayag si dating DPWH Secretary Manuel Bonoan kontra ki ROmualdes mantang nasa preliminary investigation stage pa sana an kaso.
Hinagad man kan legal team na mahiling an pahayag kan 28 bagong testigo kan Ombudsman ngani na pormal na makapagsumiter an lehislador kan saiyang kasimbagan asin kontra-affidavit.
Nag-ugat an pagkaka imbwelto ni Romualdez sa kontrobersya kan Setyembre 2025 kan pangaranan siya kan nagkapirang contractor asin dating security personnel sa mga serye kan pagdangog sa Senado.
Nagkapirang beses man na pinahimutikan kan lehislador an mga ipig-aakusar na kickback asin pigduon na wara siyang anuman na kinaaraman sa pagpapaluwas nin pondo o sa pagpapaotob sa mga proyekto kan DPWH.
