LEGAZPI CITY-Ipig-sugo kan Department of Energy (DOE) sa Philippine National Oil Company (PNOC) na magbakal nin dai mababa sa sarong milyon na bariles nin diesel bilang reserbang suplay kan gobyerno, sa tahaw kan padagos na paglangkaw kan presyo sa produktong petrolyo asin pagkahadit sa pankinabang merkado.
Segun ki Director Rino Abad kan Oil Industry Management Bureau (OIMB-DOE), direktiba ini hale kay DOE Secretary Sharon Garin ngani na masieto na igwang magkakanigong supply nin diesel an nacion enkaso magkaigwa nin biglaan na pagkagambala sa distribusyon.
Paliwanag ni Abad, gagamiton kan ahensya an sadiri nindang pondo sa pagbakal kan diesel reserve asin ipabakal sa mga oil companies nin warang patong huli sa dai pinaglalaoman an paglangkaw pa kan market price.
Target ngonian kan gobierno na magbakal nin mga supply hale sa mga nacion arog kan South Korea, Japan, Singapore, Malaysia, Indonesia, asin Canada, na piglalaoman na makakadagdag sa supplay sa Pilipinas.
An lakdang parte kan contingency plan kan gobierno sa tahaw kan tensyon sa Middle East partikular na an banta kan pagsarado kan Strait of Hormuz na saro sa pinakaimportanteng ruta kan krudo sa kinaban.
