Pormal nang kinasuhan kan prosekusyon kan International Criminal Court (ICC) si dating Presidente Rodrigo Duterte nin nagkapirang bilang nin murder asin attempted murder, na pigkokonsiderar na crimes against humanity.
Sakop kan mga kaso an mga panggagadan poon 2013 sagkod 2018—kan alkalde siya kan Davao City asin dagos na nagin Presidente kan Pilipinas.
Sa First Count, konektado si Duterte sa paggadan sa 19 indibidwal, kabale an tolong aki, sa Davao City kan 2013 sagkod 2016, na soboot ginibo kan sarong grupo na inapod na Davao Death Squad.
Sa Ikaduwang Bilang, kinasuhan siya sa paggadan kan 14 na kinonsiderang “high value targets” sa manlaen-laen na parte kan nasyon poon 2016 sagkod 2017, sa paagi suboot nin sarong network na kabali an mga state actors.
Sa Third Count, konektado an paggadan sa 43 katawo asin an pagporbar na gadanon an duwa pa sa ginibong barangay clearance operations poon 2016 hasta 2018, na suboot ginibo kan inapod na National Network.
Segun sa prosekusyon, si Duterte igwa nin indibidwal na paninimbagang kriminal bilang sarong indirect co-perpetrator susog sa Article 25(3)(a) ng Rome Statute.
Ipigdoon kan mga prosecutor na siya suboot an nagdisenyo asin nagbusol nin mga operasyon kontra krimen, nag-supervise kan Davao Death Squad, nagtao nin mga instruksyon manungod sa mga paggadan, nagtao nin mga armas, nagdesignar nin mga pangenot na opisyal, nagtao nin mga insentibo, nagseguro nin impunity, asin hayagang nagkondenar o nagtao nin rason sa mga paggadan.
Sa ibong na lado, inakusaran man siya nin pagsugo, pag-agyat, asin/o pagtabang sa paggibo nin mga krimen susog sa Articles 25(3)(b) at 25(3)(c) kan Rome Statute.
Sa ngonian, nakadepende sa confirmation of charges hearing kun igwa nin supisyenteng basehan nganing ipadagos an kaso sa sarong full trial.
 has formally charged former President Rodrigo Duterte with several counts of murder and attempted murder, which are considered crimes against humanity.){kind=link}