LEGAZPI CITY-Nangangapudan nin tabang pinansyal an mga Mayon evacuees sa Barangay Quirangay sa banwaan kan Camalig, Albay.
Mantang nagkapagtatao man an gobierno nin tabang sa paagi kan pigaapod na ‘cash for work’, aminado an Punong Barangay na si Ermel Grageda, na sa ngonian kinakaipuhan kan mga residente an kwarta bilang panggastos sa urualdaw.
Segun kay Grageda sa intrevista kan Bombo Radyo Legazpi na kinakaipuhan nin kwarta kan mga nasa evacuation center para sa pag-aadal kan saindang mga aki huli ta warang hanapbuhay an saindang mga magurang.
Nakapagtao nin suporta an gobyerno sa mga paraooma sa saindang lugar huli sa kadakol na mga pananom asin gulayon an natamaan kan ashfall.
Sinabi pa ni Grageda na sa herak kan Diyos, wara sainda nin nagkakahelang mantang kadakol an ibinagsak na ashfall sa saindang barangay.
Nagpapadagos man an pagpapagirumdum ninda sa gabos na enkaso igwang ashfall, tulos na maglaog asin magsarado kan saindang mga kaharongan.
Mientrastanto, naka-monitor man an saindang barangay health workers sa nutrisyon kan mga joven sa mga evacuation centers.
