LEGAZPI CITY – Nakatalaan na isagibo kan Commission on Election an satellite voter registration sa masunod na bulan sa Barangay Mayao, Oas, Albay katakod kan nagdadangadang na Barangay and Sangguniang Kabataan Elections.
Segun ki Punong Barangay Gogo Relao sa intrevista kan Bombo Radyo Legazpi na ipigsa-irarom sinda sa sarong cluster kun sain kasabayan ninda an Barangay Ilaor Norte kun kaya nai-paabot na ninda sa saindang kahimanwa an naunambitang impormasyon.
Magayon suboot na natawan nin schedule an saindang lugar nganing dae na makisabayan an saindang mga residente sa pagruso kan mga mawot magparehistro sa main office komisyon sa banwaan.
Basado man sa saindang datos, dakol an numero kan saindang residenteng may edad 15 sagkod 18 anyos siring man an mga mawot magpabago kan saindang mga voters information nganing makapagboto sinda sa mangyayaring pirilian sa Nobyembre.
Kahagadan man ni Relao sa komisyon na magpoon kan saindang pagpaparehistro nin amay mantang dae na dapat magduwang isip an mga new voters na aprobitsaran ini nganing dae man maabutan nin banggi an aktibidad.
Madepende man suboot sa pag-uugali kan mga registrants kun magkakaigwa nin kadifisilan sindang makakahampang sa enterong durasyon kan voter registration arug na sana kan problema sa pila asin pag-abot sa oras kun nuarin ma-cut off na an pila.
Punto pa kan opisyal na labing importante an pagpaparehistro nganing magamit ninda an saindang diretsos na mag-elihir nin maray na lideres, mapa Barangay man, Lokal, asin National positions.
