Naglalaom si House Committee on Public Accounts Chair Terry Ridon na matatawan nin liwanag ni Ramil Madriaga an tunay na identidad kan mga pangaran arog kan “Mary Grace Piattos” na suboot nakaresibe nin ginatos na milyones de pesos na confidential funds gikan sa Office of the Vice President (OVP) asin Department of Education (DEPED).
Sigon ki Ridon, importante an posibleng testimonya ni Madriaga ngani na maaraman kun sisay an nasa likod kan mga pangaran na nakalaog sa poco mas o menos P612 milyon na confidential funds na dati nang pigkwestyon kan mga mambabatas.
Sinabi pa ni Ridon na bilang sarong insider suboot sa pag-asikaso kan confidential funds, pwedeng ipaliwanag ni Madriaga kun pano nakabali sa liquidation documents kan OVP asin DepEd an mga kuwestiyonableng pangaran na isinumiter sa Commission on Audit (COA).
Tinawan doon ni Ridon na kun mapatunayan na peke an mga pangaran, dapat na panimbagon an mga responsable sa pagmukna, pag-aprobar, asin pag-liquidate kaini.
Mientrastanto, pigkakahampang ni Vice President Duterte an duwang impeachment complaints na isinangat kan nakaaging aldaw, kun sain kabale sa mga alegasyon iyo an pahayag ni Madriaga na suboot naghatod siya nin dakulang kantidad nin kwarta sa manlaen-laen na indibidwal sa kasuguan kan bise presidente.
An mga reklamo pormal nang ipinadara sa Office of the Speaker of the House para sa magkakanigong aksyon.
 and Department of Education (DEPED).){kind=link}