LEGAZPI CITY-Apektado kan nakalihis na bagyong basyang an dai mababa sa 467,000 na mga indibidwal hale sa Visayas asin Mindanao susog sa datos kan Office of Civil Defense (OCD).
Segun kay OCD Spokesperson Junie Castillo, nagpakol sa 132,000 na mga pamilya hale sa 850 na mga barangay an apektado asin nagtetenir sa mga evacuation centers.
Afuera digdi, nagtetenir man sa 12 an nairehistrong nagadan huli sa bagyo asin ngonian nagsasairarom pa sa beripikasyon kan kabilugang mga datos.
Apat man an nairehistrong gadan sa Cagayan de Oro huli sa landslide, mantang an natatada huli sa pagkalunod sa matinding mga pagbaha sa lugar.
Mientrastanto, nasa 445 na an mga naraot na kaharongan kun sain 38 an totally damaged mantang nasa 407 naman an mga partially damaged.
Padagos an pigsasagibong beripikasyon kan ahensya manungod sa limang nairehistrong nagadan sa Iligan City.
