LEGAZPI CITY-Itinaas kan Department of Social Welfare and Development (DSWD) sa Red Alert an saindang national disaster response status mantang padagos na pigbabantayan an matinding epekto kan Southwest Monsoon sa dakulang parte kan Luzon asin Visayas.
Kasabay kaini, itinaas man kan National Disaster Risk Reduction and Management Council (NDRRMC) an National Disaster Response Status sa pinakahalangkaw na lebel o Red Alert.
Susog sa pinakahuring report kan state weather bureau, piglalaoman na magpapadagos an mauran na panahon sa bilog na Luzon asin Visayas ngonian na weekend, partikular na sa mga lugar sa Western Luzon. Huli digdi, pigsierto kan DSWD na preparado na an gabos nindang field offices mantang nakaposisyon man an mga relief resources sa manlaen-laen na rehiyon.
Sa presente, labi sa 3.4 milyon na Family Food Packs (FFPs) an nakastandby sa mga bodega asin strategic location sa bilog na nasyon.
Apwera kaini, igwa man nin P558.77 million na Quick Response Fund (QRF) an ahensya na nakahandang gamiton para sa tulos na tabang asin pagresponde sa kalamidad.
Padagos an pakikipagkoordinar kan DSWD sa mga local government units (LGUs) asin iba pang ahensya kan gobierno ngani masierto an tulos na pagpapadara nin ayuda sa mga pamilya na posibleng apektado nin baha, nangangaipo nin evacuation, o igwa pang pangangaipo.
Mientrastanto, basado sa pinakahuring report kan NDRRMC, maabot sa 104 na lokalidad sa nacion an nagdeklara nin State of Calamity huli sa pinagsararong epekto kan nakaaging bagyong Luis, Maymay, asin Neneng, na orog pang pinakusog kan padagos na presensya kan Habagat.
