Boluntaryong nagsuko si Albuera, Leyte Mayor Rolan “Kerwin” Espinosa sa National Bureau of Investigation (NBI) ngonian na Huwebes, Pebrero 5.
Ini an kasunod kan inisyung warrant of arrest kan Regional Trial Court (RTC) Branch 14 sa Cebu City laban saiya asin iba pa katakod sa kasong murder.
Sa video message sa saiyang mga supporters, sinabi ni Espinosa na boluntaryo siyang nagsuko sa korte alas 10:00 nin aga asin dae na hinalat na iserbi saiya an warrant.
Nangapudan man si Espinosa nin pangadyi para sa saiyang kaligtasan na wara nin maraot na mangyari saiya.
Base sa close aide kan alkalde, wara man nin ideya si Espinosa sa kasong isinangat laban saiya.
Enot kaini, base sa kopya kan warrant, ipinaluwas ini kan korte kasuodma, Pebrero 4.
Sinayumahan man kan jusgado an pyansa ki Espinosa, kaibanan an mga kaiba kaini na akusado na sinda Ronald Danieles Bulak, Eddie Mar Demingoy Mitra, asin Marcelo Adorco.
Enot nang sinabi ni Espinosa na preparado siyang hampangon an anuman na reklamo alagad nanindugang wara siyang ideya manungod sa mga charges laban saiya.
Sa sarong entrevista ki Espinosa, sinabi kaini na an kaso an saro nanamang taktika kan saiyang kalaban sa pulitika nganing pahalion siya bilang alkalde, kapareho kan ginibo suboot sa saiyang ama na si dating Mayor Rolando Espinosa Sr., na ginadan sa laog kan Baybay City sub-provincial jail kan Nobyembre 5, 2016 sa ginibong operasyon kan Criminal Investigation and Detection Group.
Magigirumduman na antes an pirilian, kan Abril 2025, nakaligtas si Espinosa sa sarong ambush attempt laban saiya mantang nag-aatender sa sarong event sa sarong gym sa Barangay Tinag-an, na suboot ginibo kan saiyang kalaban sa pulitika.
