Ipinasara kan Department of Social Welfare and Development (DSWD) an sarong bako lisensiyadong care facility na pigpapadalagan kan vlogger na BenchTV sa San Pedro, Laguna.
Isinairarom sa suspension of operations an pasilidad makalihis an inspeksiyon kan ahensya kan Huwebes.
Nadiskubre kan DSWD an 12 indibidwal sa laog kan pasilidad, kabale an duwang menor de edad.
Anom digdi, kabale na an mga kaakian, an ibinalyo sa pangangataman kan DSWD nganing matawan nin magkakanigong tabang asin interbensyon.
Segun sa ahensya, an mga lisensyadong social workers an nagtabang sa mga benepisyaryo asin pormal na pig-endorso an mga ini sa mga matanggap social workers ngani na masyerto an pagpapadagos kan serbisyo.
Idinagdag pa kan DSWD na padagos man an saindang pagtabang sa vlogger sa pagsunod sa mga kinakaipuhan na rekisitos nganing makakuwa nin Certificate of Registration asin License to Operate, susog sa eksistidong regulasyon para sa social welfare facilities.
