LEGAZPI CITY- Nagpapadagos an pagpapaabot nin tabang kan Department of Agriculture Bicol sa mga ataman na hayop na apektado kan nagpapadagos na aktibidad kan bulkang Mayon.
Kaibanan sa mga ini an ipig-ebakwar sa banwaan kan Daraga, Guinobatan, Camalig, asin ciudad kan Legazpi.
Segun ki Department of Agriculture Bicol Spokesperson Lovella Guarin sa intrevista kan Bombo Radyo Legazpi na nasa 518 na mga livestock na an dinara sa mga pooling sites ngani na masierto an seguridad kan mga ini.
Napag-araman na nasa 224 livestock raisers an nagdesisyon na i-ebakwar an saindang mga ataman hali sa 6km permanent danger zone.
Sinabi kan opisyal na naghatod na an ahensya nin mga lubid, feeds asin nagtao nin bulong sa mga ataman na hayop.
Mientras tanto, sa presente sinabi ni Guarin na wara pa man sindang nareresibeng report na igwa ng mga hayop na nagkakahelang huli sa aktibidad kan bulkang Mayon.
